தமிழில் அநேகக் கலைச் சொற்களும் ஆட்சிமொழிச் சொற்களும் உருவாவதற்கு தமிழக அரசுகளும் கரணியமாய் இருக்கின்றன. ஒரு சொல் இவ்வாறு ஏற்றுக் கொள்ளப்பட்டு அறிவிக்கப்பட்டவுடன் அரசு தொடர்பான எல்லா ஆவணங்களிலும் அது இடம் பெறத் தொடங்குகிறது. நாளாவட்டத்தில் அது பொதுமக்களின் அன்றாடப் பயன்பாட்டில் கீழ் வந்து விடுகிறது. இந்த வகையில் அரும்பணியாற்றிய காலஞ்சென்ற ஆட்சிமொழிக் காவலர் இராமலிங்கனாரின் சேவை அளவிட முடியாதது.

மிகக் குறுகிய காலக்கட்டத்தில் கூடச் சொற்கள் மாற்றமடைகின்றன. பத்தாண்டு காலத்தை மிகப் பெரும் கால இடைவெளியாக எடுத்துக் கொள்ள முடியாது. கீழ்வரும் பட்டியல் கால் நூற்றாண்டு காலத்தில் ஏற்பட்ட மாற்றத்தை அறிந்து கொள்ள உதவுகிறது. இந்த மாற்றங்கள் யாரால் எப்போது அறிமுகப்படுத்தப்படுகின்றன என்பது மற்றொரு தனி ஆய்வாக அமையும். இதே போல ஆங்கிலச் சொற்களுக்கான மொழிபெயர்ப்பும் கூட காலத்திற்குக் காலம் மாறிவருகின்றன. அறிஞர் ம. சிங்காரவேலர், 1931-ல் செய்த மொழிபெயர்ப்பு இன்று எங்ஙனம் செய்யப்படுகிறது என்பதை இது காட்டும்.

இது போல மொழிபெயப்புகள் காலத்திற்குக் காலம் மாற்றமடைந்து கொண்டே வருகின்றன. கலைச் சொற்களின் தமிழ் மொழிபெயர்ப்பு இவ்வாறு மாற்றம் பெற்றிருப்பதைப் பரவலாகக் காணமுடியும்.

இலக்கணம் தொடர்பான சொற்கள் கூட நாளாவட்டத்தில் மாற்றமடைகின்றன. மிக நுணுக்கமான மாற்றங்களைக் கூடக் காணமுடிகிறது. சொற்பொருள் ஆய்வியல் (Semantics) என்பதைப் பெருண்மையியல் என்றும், பயனீட்டு வாதம் (Pragmatics) என்பதைப் பயன்வழியியல் என்றும், சொற்தொடரியல் (Syntax) என்பதைத் தொடரியல் என்றும் டாக்டர் -. முத்தையா பொருண்மையியல் பயன்வழியில் (1982) என்ற தனது நூலில் பயன்படுத்தினார். மேல்நிலை ஆராய்ச்சியில் ஈடுபடுவோர் இத்தகைய மாற்றங்களைச் செய்து வருவது நாளும் நடைபெற்று வருகிறது. இவற்றை மொழிபெயர்ப்பாளர் கருத்தில் கொள்ளுதல் வேண்டும்.